आज पूर्व राजा ज्ञानेन्द्रको कपिलवस्तु सवारी, कार्यक्रम कहाँ कहाँ छ ?

मायादेवी अनलाइन, वाणगंगा ।
साताव्यापी भ्रमणको क्रममा प्रदेश ५ मा आउनुभएका पूर्व राजा ज्ञानेन्द्र शाह शुक्रबार (आज) कपिलवस्तु आउनुहुने भएको छ । गोरुसिंगेस्थित पशुपति मन्दिरको दर्शकका लागि पूर्व राजा कपिलवस्तु आउन लाग्नुभएको हो ।
पूर्व राजाको कपिलवस्तु आगमन हुने भएपछि राजा पक्षधरले प्रचार प्रसारलाई तीव्रता दिएका छन् । विहीबार पाल्पा र त्यसभन्दा अगाडी रुपन्देहीका विभिन्न धार्मिकस्थलको दर्शन गर्नुभएका पूर्व राजा शाहले कपिलवस्तुमा पनि उहाँका शुभचिन्तक र नागरिकसंग भेटभाट गर्ने कार्यक्रम तय भएको बताइएको छ ।
उहाँले कपिलवस्तुको चारनम्बर जीतपुरमा ओर्लिएर केही समय नागरिकसंग भेटघाट गर्ने जनाइएको छ । यद्यपि यसको समय भने तय भएको छैन् । गोरुसिंगेमा भने दिउँसो ३ बजे पशुपति मन्दिरमा पुग्ने उहाँ निकट स्रोतले मायादेवी अनलाइनलाई बतायो । पूर्व राजाको आगमनको सुचनाले उहाँलाई भेटघाट गर्न शिव सेना नेपाल कपिलवस्तु, हिन्दु धर्मसंग सम्बन्ध संघसंस्था तथा पूर्व राजानिकटहरुले स्वागतको तयारी गरेको बुझिएको छ ।