कपिलवस्तुमा वडा कार्यालयको भवन बनाउन एक करोड लागत

मायादेवी अनलाइन, तौलिहवा ।
कपिलवस्तु नगरपालिका वडा नम्बर ३ को भवन शिलान्यास गरिएको छ । कारागार छेउमा रहेको सरकारी जमिनमा पूजापाठ गरी मेयर किरण सिंहले भवनको शिलान्यास गरे । भवन नहुँदा वडा कार्यालय भाडामा संचालन हुँदै आएको छ । सो अवसरमा मेयर सिंहले भवन निर्माण पछि वडाबासीलाई सेवा सुबिधा पाउन सहज हुने बिश्वास ब्यक्त गरे ।
वडा नम्बर २ को वडा कार्यालय समेत एक दुई दिन भित्र शिलान्यास गर्ने गरी तयारी गरिएको छ । कुल १ करोड १२ लाख ६० हजार लागतमा ४ कोठे र दुई तले भवन निर्माण हुने नगरपालिकाका इन्जिनीयर चन्डी प्रसाद देवले बताए । अर्घाखाँची, तपेश्वरी, श्रीराम जेभी ठेकेदार कम्पनीले पाएको ठेक्का यही आर्थिक बर्ष भित्र सम्पन्न गर्ने सम्झौतामा उल्लेख छ ।
सो अवसरमा वडा अध्यक्ष प्रकाश गैरेले सानो समिति कोठामा सेवा दिन अप्ठेरो परेको बताए । भवन निर्माण पछि कर्मचारी, वडाबासी र जन प्रतिनिधिलाई समते सहज हुने उनले बताए । कार्यक्रममा वडा नम्बर २ का वडा अध्यक्ष रामभजन कलवार, नगरपालिकाका शिक्षा सल्लाहकार कनकमान श्रेष्ठ, नेपाल शिक्षक संघका जिल्लाअ अध्यक्ष अफक अहमद खाँ नगरपालिकाका सामाजिक सल्लाहकार सुरेन्द्रराज लम्साल लगायतको सहभागीता थियो ।