अर्घाखाँचीको मालारानी–३ मा खस्यो ७३ प्रतिशत मत

विष्णुकुमार आले, अर्घाखाँची ।

अर्घाखाँचीको मालारानी गाउँपालिका–३ मा उत्साहजनक रुपमा मतदान जारी रहेको छ । अहिले ३ बजेसम्म करिब २ हजार  १ सय ९१ मत खसेको छ । मतदाताको अनुपातमा ७२.७६५ मत खसेको छ । शान्तिपूर्ण रुपमा मतदान जारी रहेको प्रमुख जिल्ला अधिकारी बिजयराज पौडेलले जानकारी दिए ।

सो वडामा ३ हजार ११ मतदाता रहेका छन् । वडाध्यक्ष जीवन कुमार चौवानको ०७४ साल पौष १३ गते रूपन्देहीको रानीबगीयाँमा मोटरसाईकल दुर्घटनामा परी मृत्यु भएपछि अहिले उपनिर्वाचन भएको हो । निर्वाचनको लागि २ स्थलमा ४ मतदान केन्द्र तोकिएको मुख्य निर्वाचनको कार्यालय गुल्मीले जनाएको छ । आदर्श माबि खनदह स्थलमा क, ख र सुन्दरा मावि सातडाँडा स्थलमा क, ख मतदान गरि ४ मतदान केन्द्र रहेका छन् । जसको लागि ४ जना मतदान अधिकृत र अन्य सहयोगी गरि १२ जना कर्मचारी मतदान स्थलमा खटिएका छन् ।

मतदाताले बेलुकी ५ बजेसम्म मतदान गर्न पाउने छन् । मतदान सकिएपछि  मतपेटीका मुख्य निर्वाचन अधिकृतको कार्यालय खनदहमै संकलन गरेर शनिबार बेलुकीबाटै मतगणना सुरू हुने जिल्ला निर्वाचन कार्यालय अधिकृत लाल प्रसाद भुसाल शर्माले बताए ।

प्रमुख जिल्ला अधिकारी विजयराज पौडेलका अनुसार मतदान स्थलको सुरक्षाको लागि नेपाल प्रहरी १७६ जना, शसस्त्र प्रहरी ११५ र नेपाली सेना २९ जना खटिएका छन् । वडा अध्यक्ष पदको उम्मेदवारमा नेकपाले यमलाल खनाल, नेपाली कांग्रेसले शोभाखर खनाल र  राप्रपा नेपालले रणबहादुर खनाललाई उम्मेदवार बनाएको छ ।

यो पनि पढ्नुहोस

अर्घाखाँची मालारानी–३ उपनिर्वाचनः मतदान गर्न मतदाता लामबद्ध (फोटोफिचर)

अर्घाखाँची मालारानी–३ मा उत्साहजनक मतदान