प्रतिष्ठान चुनावः हारमा विष्णु खत्रीको ह्याट्रिक, रमेश विजी विजयी

पोखरा ।

राष्ट्रिय लोक तथा दोहोरी गीत प्रतिष्ठानको अध्यक्षमा रमेश विजि चयन भएका छन् । पोखरामा भएको सातौँ केन्द्रिय महाधिवेशनमा उनले बिष्णु खत्रीलाई ३९ मतले पछि पारेका हुन् । चर्चित लोक तथा दोहोरी गायक रहेका खत्रीको यो हार तेस्रो हो । यसभन्दा अगाडी खत्री चन्द्र शर्मा र बद्र पङ्गेनीसंग पनि हारेका थिए ।
विजिले ५ सय ८४ मत ल्याएका थिए भने खत्रीले ५ सय ४५ मत प्राप्त गरे । यस्तै कोषाध्यक्षमा राजु ढकाल विजयी भएका छन् । उनले तारापती सुवेदीलाई हराएका हुन् । ढकालले ७ सय ३७ मत प्राप्त गरे भने सुवेदीले ३ सय ७२ मत ल्याएका छन् ।
केही पदको लागि भने कलाकारहरु निर्विरोध चयन भएका थिए । वरिष्ठ उपाध्यक्षको लागि गायिका रीता थापामगर निर्विरोध चुनिएकी छिन् । त्यस्तै, प्रथम उपाध्यक्षमा गायक पशुपति शर्मा निर्विरोध निर्वाचित भएका छन् । द्धितिय उपाध्यक्षमा रामजी खाँड चुनिएका छन्। महिला उपाध्यक्षको कोटामा गायिका राधिका हमाल निर्विरोध भएकी छन् ।

महासचिव, उप महासचिव र सांगठनिक सचिव पदमा पनि कलाकारहरु निर्विरोध चुनिएका छन् । सुवास केसी प्रतिष्ठानको नयाँ सचिव बनेका छन् भने शंकर वीसी र शिव हमाल उप–सचिव निर्वाचित भएका छन् ।

सांगठनिक सचिव तर्फ खुमन अधिकारी निर्विरोध भए । महिला सचिवको पदमा जमुना राना मगर निर्विरोध निर्वाचित भएकी छिन् । १३ सय ४८ जना कूल मतदाता रहेकोमा ११ सय ३७ मत खसेको थियो ।