आमा गुमाएकी अंशुलाई सिटिजन लाइफद्धारा साढे ५ लाख हस्तान्तरण, साढे १४ बर्ष सम्म मासिक ५ हजार पाउने

मायादेवी अनलाइन, कपिलवस्तु ।

सिटिजन लाइफ ईन्स्योरेन्स क.लि.ले मृत्यु दाबी भुक्तानी गरेको छ । कम्पनीले बीमित अँशु विश्वकर्माका आमा (प्रस्तावक) पुष्पा कुमारी शर्मा बढईको मृत्यु बापत ५ लाख ५० हजार हस्तान्तरण गरेको हो । कम्पनीको भैरहवा शाखा मार्फत गत बैशाख ३० गते ५ लाखको बिमा गरेका विश्वकर्मा परिवारको निवास रुपन्देहीको सिद्धार्थनगर नगरपालिका वडा नं ४, कचरिहवा पुगेर एक कार्यक्रमको बीच कम्पनीले मृतकको परिवारजनलाई उक्त मृत्यु दाबी रकम भुक्तानी गरेको हो ।
मृतक बढईका श्रीमान दिगविजय विश्वकर्मालाई कम्पनीका भैरहवा शाखा प्रबन्धक नरेश सिग्देल र सिद्धार्थनगर न. पा. वडा नं ४ का वडा अध्यक्ष मुक्तिनाथ यादवले संयुक्त रुपमा ५ लाख ५० हजार बराबरको चेक हस्तान्तरण गरेका हुन । दावी रकमको चेक हस्तान्तरण गर्दै शाखा प्रबन्धक सिग्देलले बीमाले दुख पर्दा साथ दिने र दुर्घटना बाजा बजाएर नआउने भन्दै बीमाको महत्व तथा आवश्यकता माथि प्रकाश पारेका थिए । त्यसैगरी विगतमा भारतिय जीवन बीमा कम्पनीबाट बीमा गराउँदा यहाँका जनताले दावी प्रक्रियामा निकै दुःख भोग्नु परेको स्मरण गर्दै अहिले नेपाली कम्पनीहरुले इमान्दारिताका साथ समयमै दावी रकम भुक्तानी गर्नाले जनतालाई सहज हुनुको साथै जनतामा नेपाली बिमा क्षेत्र प्रती बिश्वास थपिदै गएको बताए। त्यसैगरि वडा अध्यक्ष मुक्तिनाथ यादवले सिटीजन लाइफ इन्स्योरेन्सले यसरी घरैमा आएर भुक्तानी दिनु निकै सराहनिय कार्य भएको भन्दै खुशी व्यक्त गरेका थिए । कार्यक्रममा स्थानिय बुद्धिजिवीहरु कन्हैया लाल गुप्ता, श्रीराम गुप्ता, सिकन्दर अली, प्रेमलाल यादव, राम लखन सिंह, शोले यादव तथा कम्पनिका एजेन्सी म्यानेजर पार्वती रेग्मी, सुधिर पौडेल, ग्यासुद्दीन खान पठान लगायतले बोलेका थिए ।
जीबन बीमा अभिकर्ता निलम शर्मा मार्फत विश्वकर्मा परिवारले गत वैशाखमा ५ लाखको १५ वर्षे सिटिजन बाल भविष्य योजना नामको बीमा खरिद गरेको कम्पनीले जनाएको छ । गत असोज १८ गते वर्त बसेकी मृतक बढईको सोही दिन एक्कासी ढलेर मृत्यु भएको परिवारको भनाइ छ । मृतक परिवारले प्रथम बीमा शुल्क बापतको ४० हजार ८ सय ९१ रुपैया मात्र कम्पनीलाई बुझाएका थिए । कम्पनीका अनुसार, मृतक परिवारको मानवीय क्षती (मृत्यु) बापत ५ लाख र काजक्रिया खर्च बापत ५० हजार गरी ५ लाख ५० हजार रकम एकमुष्ठ तत्काल भुक्तानी गरेको हो । त्यती मात्र नभएर ५ वर्षिय अँशुले बीमा अवधी कायम रहुन्जेल अर्थात अझै साढे १४ वर्ष सम्म कम्पनीबाट मासिक ५ हजार रुपैयाका दरले मासिक आय लाभ पाउनेछिन्, भने अब उनको परिवारले कम्पनीलाई कुनै रकम बुझाउनु पर्ने छैन । बीमा अवधि समाप्तिमा अंशुले ५ लाख बीमाङ्क र नियमअनुसारको बोनस एकमुष्ठ पाउने कम्पनीले जनाएको छ ।