भारत, चीन र रूसको फोहोर अमेरिका पुग्योः ट्रम्प

एजेन्सी ।

अमेरिकी राष्ट्रपति डोनाल्ड ट्रम्पले भारत, चीन,रूसको फोहोर अमेरिका पुग्ने गरेको बताएका छन्। मंगलबार न्युयोर्कको इकोनोमिक क्लबमा भएको कार्यक्रममा बोल्दै उनले भारत, चीन, रूसलगायतका राष्ट्रले धुँवा तथा उद्योगबाट निस्कने फोहोरको व्यवस्थापन नगरेको आरोप लगाए। ‘अमेरिका थोरै क्षेत्रफल भएको राष्ट्र हो,’ उनले भने, ‘भारत, चीन र रूसजस्ता देश अमेरिकाको तुलनामा धेरै ठूला छन् तर तिनले वातावरण संरक्षण गर्न केही गरेका छैनन्।’ ती राष्ट्रले फोहोर समुद्रमा फालेको फोहोर तैरिएर अमेरिकास्थित लसएन्जल्समा पुग्ने गरेको ट्रम्पको भनाइ छ। बढ्दो जलवायु परिवर्तन गम्भीर विषय रहेको उल्लेख गर्दै उनले विश्वास गरे पनि नगरे पनि आफू वातावरणप्रेमी रहेको दाबी गरे । ट्रम्पले पेरिस जलवायु परिवर्तन सम्झौता अमेरिकाको लागि उपयुक्त नभएको र सो सम्झौताले अर्बौंको घाटा हुने बताए। ट्रम्पले पेरिस सम्झौताबाट सन् २०१७मा अमेरिकालाई अलग बनाएका थिए।