चेल्सीको लगातार जित, क्रिष्टल प्यालेस २–० ले पराजित

एजेन्सी । 

चेल्सीले चार वर्षपछि इंग्लिस प्रिमियर लिगमा लगातार ६ खेलमा जित निकालेको छ । लिग अन्तर्गत शनिबार राति भएको खेलमा चेल्सीले क्रिष्टल प्यालेसलाई २–० ले पराजित गरेको हो ।

यो सिजन लिगमा उसको यो लगातार छैटौँ जित हो । सिजनको सुरुमा खासै राम्रो गर्न नसकेको चेल्सीले पछिल्ला खेलहरुमा लगातार जित निकालिरहेको छ ।

सन् २०१६–१७ को सिजनमा च्याम्पियन बनेको चेल्सीले सोही सिजन लगातार जितको शृङ्खला कायम राखेको थियो । त्यसपछि यो नै पहिलो पटक हो ।

घरेलु मैदानमा भएको खेलमा पहिलो हाफमा गोल हुन सकेन । चेल्सीले दुवै गोल दोस्रो हाफमा गरेको हो । ट्यामी अब्राहमले ५२ औँ मिनेटमा गोल गर्दै चेल्सीलाई अग्रता दिलाए ।

क्रिष्टियन पुलिसिकले ७९ औँ गोल गर्दै चेल्सीको २–० को जित निश्चित गरे । जितपछि १२ खेलबाट २६ अंक जोडेको चेल्सी तेस्रो स्थानमा पुगेको छ ।

लेस्टर सिटीको पनि २६ अंक नै भए पनि उ दोस्रो स्थानमा छ । चेल्सीले एक खेल कम खेलेको म्यानचेस्टर सिटीलाई एक अंकले पछि पारेको हो ।

लिग अन्तर्गत शनिबार राति भएका अरु खेलमा बर्नलीले वेष्ट ह्यामलाई ३–० तथा एभर्टनले साउथह्याम्पटनलाई २–१ ले पराजित गरेको छ । टोटनह्याम र शेफिल्ड युनाइटेडले १–१ को बराबरी खेलेका छन् ।