टि ट्वान्टी विश्वकप छनोटः ओमानको विजयी सुरुवात

एजेन्सी ।
घरेलु टोली यूएई आईसीसी टि ट्वान्टी विश्वकप छनोटको पहिलो खेलमै ओमानसँग ७ विकेटले पराजित भएको छ । शुक्रबार राती सम्पन्न खेलमा घरेलु टोली यूएईमाथि सहज जित निकाल्दै ओमानले सुखद सुरुवात गरेको हो ।
१ सय ९ रनको सामान्य विजयी लक्ष्य पछ्याएको ओमानले १८.२ ओभरमा ३ विकेट गुमाउँदै पुरा गर्यो । अकीव इलियासले ५१ बलमा ३ चौका सहित अविजित ४५ रन जोडे । अमिर कलिम २७,जेशन मक्सुद १६ र जितेन्द्र सिंहले १५ रनको योगदान दिए ।
यूएईका लागि अमिद राजा र जुनैद सिद्दीकीले समान १ विकेट लिए । त्यसअघि टस हारेर ब्याटिङ थालेको यूएईले २० ओभरमा ९ विकेट गुमाउँदै १ सय ८ रन मात्र बनाउन सकेको थियो । यूएईका लागि ओपनर चिराग सुरीले १६, रोहन मुस्तफा २४, मुहम्मद उस्मान २७ र रमिज शहजादले १४ रन जोड्न बाहेक अन्यले राम्रो प्रर्दशन गर्न सकेनन् ।
बिलाल खान र फयाज बट्ट समान ३ विकेट लिएपछि यूएई सस्तैमा समेटिनपुगेको थियो । मोहम्मद नदीम र खवर अलीले १-१ विकेट लिए । यूएईले आजनै आयरल्यान्डसँग खेल्ने छ । ओमानले आइतबार हङकङसँग खेल्ने छ ।