युरोकप फुटबल छनौटमा इटालीको प्रभावशाली जित

एजेन्सी । 

युरोकप फुटबल २०२० मा सबै भन्दा पहिले स्थान पक्का गरेको इटालीले छनौट चरणमा प्रभावशाली नतिजाको यात्रा कायमै राखेको छ ।

समूह जे अन्तर्गत मंगलबार राति भएको खेलमा इटालीले लिचेस्टाइनलाई ५–० ले पराजित गरेको छ। अवे मैदानमा भएको खेलमा इटालीले पहिलो हाफमा एक तथा दोस्रो हाफमा चार गोल गरेको हो ।

इटालीका लागि खेलको दोस्रो मिनेटमा नै फेदेरिको बर्नार्देस्कीले गोल गरे । यस्तै आन्द्रेआ बेलोतीले ७० र इन्जुरी समयको दोस्रो मिनेट गरी दुई गोल गरे ।

यस्तै एलेसिओ रोमाग्नोलीले ७७ तथा स्तेफान एल शरावीले ८२ औँ मिनेटमा गोल गरेपछि इटाली ५–० ले विजयी भयो । ८ खेलबाट २४ अंक जोडेको इटाली समूहको शीर्ष स्थानमा छ । उसले छनौट चरणमा हालसम्मका सबै खेल जितेको छ ।

समूहको पुछारमा रहेको लिचेस्टाइनको दुई अंक मात्रै छ । सोही समूह अन्तर्गतको अर्को खेलमा दोस्रो स्थानको फिनल्याण्डले अर्मेनियालाई ३–० तथा पाँचौँ स्थानको ग्रिसले चौथो स्थानको बोसनिया हर्जगोबिनालाई २–१ ले पराजित गरेको छ ।

मंगलबार राति भएका अरु खेलमा जर्जियालो जिब्रालटारलाई ३–२ तथा स्वीट्जरल्याण्डले रिपब्लिक अफ आयरल्याण्डलाई २–० ले पराजित गरेको छ ।