बालिका बलात्कारको आरोपमा एक जना पक्राउ

रुकुम पश्चिम ।
एक बालिकालाई बलात्कारको प्रयास गर्ने एक जनालाई प्रहरीले पक्राउ गरेको छ । सानीभेरी गाउँपालिका–१ सोताटोलका ४५ वर्षीय गंगे भन्ने गंगाराम पुनलाई प्रहरीले पक्राउ गरेको बताएको छ ।
प्रहरीका अनुसार गएको भदौ २८ गते बेलुकी ७ बजे अभिभावक नभएको मौका छोपी १४ वर्षीया एक बालिकालाई बलात्कारको प्रयास गरेका पुनलाई असोज १ गते पक्राउ गरेको हो ।
जबरजस्ती करणी गर्न प्रयास गरेपछि बालिका भाग्न सफल भएकी थिइन् । पुनविरुद्ध बालिकाका आफन्तले असोज १ गते प्रहरीमा उजुरी दिएका थिए ।
उजुरी दिएको २४ घण्टामै पुनलाई पक्राउ गरिएको जिल्ला प्रहरी प्रमुख प्रहरी नायब उपरीक्षक सुमित खड्काले बताउनुभयो । लुकिछिपी बसेको अवस्थामा पक्राउ परेका पुनविरुद्ध जबरजस्ती करणी उद्योगमा मुद्दा चलाइएको छ ।