इंग्लिस प्रिमियर लिगमा आर्सनलको विजयी सुरुवात

एजेन्सी । 

आर्सनलले इंग्लिस प्रिमियर लिग फुटबलको नयाँ सिजनको सुरुवात जितसहित गरेको छ । लिग अन्तर्गत सिजनको आफ्नो पहिलो खेलमा आर्सनलले न्युक्यासल युनाइटेडलाई १–० ले पराजित गरेको हो ।

अवे मैदानमा भएको खेलमा पहिलो हाफमा गोलरहित बराबरीमा रोकिएको आर्सनलका लागि ५८ औँ मिनेटमा पिएर एमरिकले गरेको गरेको गोल नै जितका लागि पर्याप्त बन्यो ।

मेसुट ओजिल तथा सिड कोलासिनाकसहितका खेलाडी बिना मैदानमा रहेको आर्सनलले जितका लागि संघर्ष गर्नु परेको देखियो ।

लिग अन्तर्गत आइतबार राति नै भएको अर्को खेलमा लेस्टर सिटी र वुल्भ्सले गोलरहित बराबरी खेल्दै अंक बाँडेर सिजनको सुरुवात गरेका छन् ।