कपिलवस्तुमा दिनदाहाडै गोली प्रहार, घाइते भन्छन्, गोली हान्नेलाई चिनेको छु

मायादेवी अनलाइन, कपिलवस्तु ।
कपिलवस्तुको तौलिहवा लुम्बिनी सडकखण्ड स्थित शुद्धोधन गाउँपालिकामा स्थानीय एक नेता माथि दिनदहाडै गोली प्रहार भएको छ । शुद्धोधन गाउँपालिका वडा नं ३ वेती नदीको सिवलवा पूल नजिक स्थानीय समाजबादी पार्टीका नेता माथि दिउँसो २ बजे गोली प्रहार भएको हो । गोली प्रहार गरिएका व्यक्ति रामनयन यादव रहेका छन् ।
गाउँपालिकाको वडा नं. ५ देवपुर स्थायी घर भएका यादव जिल्ला सदरमुकाम तौलिहवा आउँदै थिए । उक्त मौका छोपेर मोटरसाइकलमा सवार दुई जना अज्ञात समूहले गोली प्रहार गरेका थिए । स्थानीयका अनुसार उनको देब्रो पाखुरामा गोली लागेको छ ।
गोली लागेर घाइते भएका यादवको अवस्था समान्य रहेको कपिलवस्तुका प्रहरी उपरिक्षक दिप शमशेर राणाले बताउनुभयो । गोली हानी फरार रहेका व्यक्तिको खोजी कार्य भइरहेको छ । घाइते रामनयन यादवले आफुलाई गोली हानेर भागेका व्यक्ति परिचित भएको अनुसन्धानका क्रममा प्रहरीलाई जानकारी आएको बताइएको छ ।
यादव पूर्व नयाँ शक्ति पार्टीबाट गाउँपालिकाको अध्यक्षका उम्मेद्वार समेत हुन् । उनी हाल पार्टी एकता पछि समाजबादी पार्टीमा छन् । दिउँसो २ बजे गोली हान्ने अज्ञात समूहलाई प्रहरीले तत्काल पक्राउ गर्न सक्ने अवस्था भएपनि पक्राउ गर्न नचाहेको भन्दै स्थानीय आक्रोसित भएका छन् ।
केही महिना अघि शुद्धोधन गाउँपालिकाका दीपेन्द्र चौधरी (राजाबावु) को गोली हानी हत्या भएको थियो । राजाबाबु नेकपाका नेता थिए । उनी पनि गाउँपालिकामा अध्यक्षमा उठेका थिए भने प्रदेश सभा निर्वाचनको उम्मेद्वार थिए । बेला बेला नेतामाथि गोली प्रहार हुन थालेपछि उक्त क्षेत्रका स्थानीय त्रसित भएका छन् ।