सरकार असफल भयो, अब मुलुकको प्रमुख शक्ति कांग्रेसः युवा नेता थापा

मायादेवी अनलाइन, कपिलवस्तु ।
नेपाली कांग्रेसका युवा नेता गगन थापाले सरकारले जनभावना अनुसार काम गर्न नसकेको बताउनु भएको छ । शिवराज नगरपालिका कपिलवस्तुमा आइतबार नेपाली कांग्रेसले आयोजना गरेको आमसभा तथा पार्टी प्रवेश कार्यक्रमलाई सम्बोधन गर्दै थापाले दुई तिहाइको नेकपा सरकारले केही गर्न नसकेको आरोप बताउनुभयो । अधिकांश समय केपी ओली सरकारको आलोचनामा खर्चनुभएका थापाले दिनप्रतिदिन सरकार कमजोर बन्दै गएको दाबी गर्नुभयो ।

पछिल्लो समय सरकारले गरेका हरेक निर्णय विवादित हुनुले सरकार कति कमजोर भएको छ भन्ने कुराको पुष्टि भएको बताउनु भयो । थापाले अब देश र जनताको जिउँदो पार्टी भनेको नेपाली कांग्रेस मात्रै भएकाले आम जनतालाई कांग्रेसको विचारमा गोलववद्ध हुन आह्वान गर्नुभयो ।

वर्तमान सरकार असफल जस्तै भएकाले अब काग्रेश कार्यकर्ताहरु सरकारका गलत कामविरुद्ध एकजुट भएर लाग्नु पर्ने आवश्यकता रहेको बताउनुभयो । अबको प्रमुख शक्ति कांग्रेस नै भएको भन्दै थापाले सबै कार्यकर्ताहरु हतास नभई उत्साहित भएर लाग्नु पनमा जोड दिनुभयो ।

कार्यक्रममा जिल्लाका सांसद तथा नेताको सहभागिता रहेको थियो भने बिभिन्न पाटीका मानिसहरु नेपाली कांग्रेसमा प्रवेश गरेका थिए । पार्टी जिल्ला सभापति सुरेन्द्रराज आचार्यको सभापतित्वमा सम्पन्न कार्यक्रममा पार्टी प्रवेश गर्ने सबैलाई प्रमुख अतिथि थापाले अबिरले स्वागत गर्दै शुभकामना दिनुभएको थियो ।