फियोरेन्टिनामाथि आर्सनलको प्रभावशाली जित

एजेन्सी ।
इडी एनकेटियाले आफू उच्च फर्ममा रहेको प्रमाण दिएपछि आर्सनलले गए राति इन्टरनेशनल च्याम्पियन्स कपअन्तर्गतको खेलमा फियोरेन्टिनामाथि ३–० को प्रभावशाली जित निकालेको छ।
नयाँ सिजन सुरु हुनुपूर्व पछिल्ला वर्षहरूमा नियमित गरिँदै आएको इन्टरनेशनल च्याम्पियन्स कपअन्तर्गत इङलिस प्रिमियर लिगको टोली आर्सनलले इटालियन प्रतिद्वन्द्वी फियोरेन्टिनालाई निराश पार्दा एनकेटियाले दुई गोल गरे।
बुधबार बायर्न म्युनिखविरुद्ध अन्तिम समयमा विजयी गोल गरेका २० वर्षे एनकेटियाले शनिबार खेलको दुवै हाफमा एकरएक गोल गरे। आर्सनलको जितमा अर्को गोल जोए विलकले गरेका थिए।
एनकेटियाले लगातारका खेलमा गोल गर्ने क्रमलाई निरन्तरता दिँदा १५औं मिनेटमा आर्सनलले अग्रता लिएको थियो। नर्थ क्यारोलिनास्थित चालोट्टेको बैंक अफ अमेरिका रंगशालामा एनकेटियाले ६५औं मिनेटमा दोस्रो व्यक्तिगत गोल गर्दै आर्सनलको अग्रता दोब्बर पारे।
आर्सनलले पूर्ण रुपमा आफ्नो पकडमा राखिसकेको खेलको समय सकिन एक मिनेट बाँकी रहँदा विलकले टोलीका लागि तेस्रो गोल गरेका थिए। १३ टोली सम्मिलित मैत्रीपूर्ण प्रतियोगिताका दुई खेलमा ६ अंक जोडेको आर्सनल शीर्ष स्थानमा छ।