अफ्रिका कप अफ नेशन फुटबलमा नाइजेरिया तेस्रो

एजेन्सी ।
इजिप्टमा जारी अफ्रिका कप अफ नेशन फुटबल प्रतियोगितामा नाइजेरिया तेस्रो भएको छ । प्रतियोगिता अन्तर्गत बुधबार राति तेस्रो स्थानका लागि भएको प्ले–अफ खेलमा ट्युनिसियालाई १–० ले पराजित गर्दै नाइजेरिया तेस्रो भएको हो ।

नाइजेरियाको जितमा ओडिअन इग्हालोले खेलको तेस्रो मिनेटमा नै गरेको गोल निर्णायक बन्यो । इग्हालो जारी प्रतियोगितामा सर्वा्धिक गोलकर्ता खेलाडीको सूचिमा शीर्षस्थानमा छन् । उनले पाँच गोल गरेका छन् ।

कायरोमा भएको खेलमा ट्युनिसियाले पनि गोल गर्ने प्रयास गरेको थियो, तर सफल हुन सकेन । नाइजेरियाले तीनपटक अफ्रिका कप अफ नेशनको उपाधि जितेको छ । योसँगै उ ८ पटक तेस्रो भएको छ । ट्युनिसियाले सन् २००४ मा उपाधि जितेको थियो ।

उपाधिका लागि शुक्रबार सेनेगल र अल्जेरियाबिच प्रतिस्पर्धा हुँदैछ । सेनेगल पहिलो पटक च्याम्पियन बन्ने होडमा छ भने सन् १९९० को च्याम्पियन अल्जेरिया २९ वर्षपछि पुनः विजेता बन्ने लक्ष्यमा छ ।