माधव नेपाल र श्रीलंकाली नेताहरुबीच भेटघाट

काठमाडौँ ।
श्रीलंका भ्रमणमा रहनुभएका नेकपाका बरिष्ठ नेता तथा पूर्व प्रधानमन्त्री माधवकुमार नेपालले त्यहाँका शीर्ष नेताहरुसँग भेटघाट गर्नुभएको छ । उहाँ श्रीलंका कम्युनिष्ट पार्टीद्वारा आयोजित विशेष कार्यक्रममा प्रमुख अतिथिका रुपमा भाग लिन कोलम्बो पुग्नुभएको थियो ।
विहीबार बरिष्ठ नेता नेपाल र श्रीलंकाका प्रधानमन्त्री रनिल विक्रमसिंगे, सभामुख करु जयासूर्या, पूर्व राष्ट्रपति महिन्द्रा राजापाक्ष, श्रीलंका कम्युनिष्ट पार्टीका अध्यक्ष राजा कोलुर लगायतसँग भेटघाट भएको थियो ।
भेटका अवसरमा नेपाल र श्रीलंकाबीचको मित्रतापूर्ण सम्बन्धका बारेमा चर्चा हुनुका साथै बुद्धको जन्मस्थान नेपाल र बौद्धमार्गी मुलुक श्रीलंका बीच जनस्तरको सम्बन्ध विस्तारमा जोड दिइएको थियो ।
लामो समय द्वन्द्व भोगेका दुबै मुलुकका नेताहरुले आ–आफ्नो देशका द्वन्द्व समाधानका अनुभवहरुका बारेमा चर्चा गर्नुभएको थियो ।
भेटघाटमा श्रीलंकास्थित नेपाली राजदूतडा. विश्वम्भर प्याकुरेलको पनि सहभागिता थियो ।
असार २३ गते कोलम्बो प्रस्थान गर्नुभएका बरिष्ठ नेता नेपाल असार २९ गते स्वदेश फर्किने कार्यक्रम छ ।