जन्मदिनको अवसरमा अर्यालले गरे असहाय बालकहरुलाई सहयोग

बिजय पौडेल ‘आभाष’, तौलिहवा ।
अखिल नेपाल स्वतन्त्र बिद्यार्थी युनियन अनेरास्ववियु कपिलबस्तुका अध्यक्ष एवं समाजसेवी बाबुराम अर्यालले जन्मदिनको अवसर पारेर तौलिहवा स्थित बालगृहका अनाथ तथा असहाय बालकहरुलाई शैक्षिक सामग्री बितरण गर्नुभएको छ ।
महंगा होटलमा केक काटेर जन्मदिन मनाउनेहरुलाई चोटिलो पाठ सिकाउँदै बाणगंगा नगरपालिका वडा नम्बर ८ का युवा नेता अर्यालले आफ्नो जन्मदिन अनाथ तथा असहाय बालकहरुलाई विद्यालय सामग्री वितरण गरेर मनाउनुभएको हो ।
बिहीबार सदरमुकाम तौलिहवास्थित बालगृहका २८ जना बालकहरुलाई आफ्नो २८ औं जन्मदिनको अवसर पारी प्रति बालक १÷१ थान विद्यालय झोला प्रदान गर्नुभएको हो । जन्मदिनको दिन होटलमा अनावश्यक खर्च गर्नुभन्दा अभिभावक बिहिन बालकहरुलाई सहयोग गर्न पाउदा खुसी लागेको अर्यालले बताउनुभयो । उनीहरुलाई पठनपाठनमा सहज हुने ठानेर विद्यालय सामग्री वितरण गरिएको समेत उहाँले जानकारी दिनुभयो ।
बालगृहका प्रमुख रामप्रसाद अर्यालले आफ्नो जन्मदिनको अवसरमा अर्यालले गर्नुभएको सामाजिक कार्य प्रति आभार प्रकट गर्नुभएको छ । कार्यक्रममा अखिल क्रान्तिकारीका जिल्ला उपाध्यक्ष दयाराम पौडेल, अखिलका केन्द्रिय सदस्य एवं जिल्ला इन्चार्ज टुकलाल गैरे, जिल्ला सदस्य कमल बन्जाडे, सचिवालय सदस्य बिजय पौडेल लगायतको सहभागिता रहेको थियो ।