बुवाआमाको स्मृतीमा शुद्धोधन माविका विद्यार्थीलाई छात्रवृत्ति

बाबुराम रायमाझी, भलवाड ।
अक्षयकोष संचालक समिति बाणगंगा- ९ जिनुवाको आयोजनामा थापा परिवारले स्वर्गिय क्याप्टेन गिरमानसिंह र तिल कुमारी थापाको स्मृतिमा छात्रवृत्ति वितरण गरेको छ । शुद्धोधन जनजिवन मा.वि. जिनुवामा अध्ययनरत नियमित बिद्यालय आउने, अनुशासित र बिद्यालयमा सर्वाेत्कृट अंक प्राप्त गर्ने विपन्न दलित, जेहेन्दार, जनजाती छात्रा गरी ४ जना विद्यार्थीलाई छात्रवृत्ति वितरण गरिएको हो ।
उनीहरुलाई जनही १०÷१० हजारका दरले ४० हजार वितरण गरिएको हो । अक्षयकोष संचालक समितिका संयोजक ठम्मनसिंह थापा, सदस्य दिपक थापा, वडा नं. ९ का वडाध्यक्ष ध्रुव बेल्वासेले छात्रवृत्ति वितरण गर्नु भएको थियो ।
छात्रवृत्ति पाउनेमा कक्षा १० की बबिता बि.क., कक्षा ७ का माधव थापा, कक्षा ९ का गोकुल थापा र कक्षा ९ का सरोज न्यौपाने रहेका छन् । कार्यक्रममा संयोजक थापाले अबदेखि छात्रवृत्तिलाई निरन्तर रुपमा वितरण गर्ने जानकारी दिदै बुवा आमाको अक्षयकोषको नाममा १ लाख ५० हजार रुपैयाँ कृषि बिकास वैंकमा रहेको बताउनुभयो ।
साथै विद्यालय स्थापना कालमा थापा परिवारले १ कट्ठा जग्गा पनि प्रदान गरेको थियो । कार्यक्रममा समाजवादी पार्टीका केन्द्रिय सदस्य नारायण खनालले विद्यालयमा सहयोगी हातहरुको प्रशंसा गर्दै थापा परिवारलाई धन्यवाद प्रदान गर्नुभयो ।
वडाध्यक्ष बेल्वासेले अक्षय कोषले बालबालिकाको पठनपाठनमा टेवा पुग्ने भन्दै यस्ता कार्यक्रमलेसबैलाई प्रेरणा मिलेको बताउनुभयो । कार्यक्रममा विद्यालयका प्रधानाध्यापक टेकलाल अधिकारीले स्वागत गर्नु भएको थियो ।
शिक्षिका रामप्यारी पौडेलले सहजिकरण गर्नु भएको कार्यक्रममा बिद्यालय व्यवस्थापन समितिका पदाधिकारी, शिक्षक अभिभावक संघ, शिक्षक, बिद्यार्थी, अभिभावक तथा समाजसेवीको सहभागिता रहेको थियो ।