पुलिसको जितमा कपिलवस्तुका सन्जुको ह्याट्रिक

मायादेवी अनलाइन, कपिलवस्तु ।
कपिलवस्तुमा हुने क्लब फुटवलमा चर्चा कमाएका वाणगंगा ४ झुँगाका सञ्जु सेनले राजधानीमा पनि सनसनि मच्चाउन सुरु गरेका छन् । मुहान एफसीबाट भर्खरै नेपाल पुलिस क्लबमा प्रवेश पाएका सञ्जुले राजधानीमा जारी ललित स्मृति कप यू–१८ च्याम्पियनसिप फुटबलको विहीबार भएको प्रि क्वाटरफाइनल ह्याट्रिक गर्दै जित दिलाएका छन् ।
बिहिबार भएको खेलमा सरस्वती युथ क्लबलाई ५–१ गोल अन्तरको जित निकाल्ने क्रममा सञ्जुले ह्याट्रिक पुरा गरेका हुन् । पुलिस क्लबबाट डेब्यु गरेपश्चात पहिलो खेलमै दुई गोल गरेर चर्चा कमाएका उनले विहीबारको खेलमा ह्याट्रिक गर्दै थप चर्चा कमाएका छन् ।
उनको यो प्रभावशाली प्रर्दशनबाट पुलिस क्लब जारी ललित स्मृति कप यू–१८ च्याम्पियनसिपको क्वाटरफाइनल नजिक पुगेको छ । यस्तै रबिन राई र एन्सन राईले एक एक गोल गरे पछि सरस्वती क्लव ५–२ को अन्तरले पराजित भएको हो ।
सरस्वतीले एक गोल आत्मघाती उपहार पाएको थियो । पुलिसका बिजेन राईले आत्मघाती गोल गरेका थिए । जितसँगै समूह ’सी’ को पुलिसले लगातार दोस्रो जित निकालेको छ । समूहको शीर्ष स्थानमा रहेको पुलिसको ६ अंक रहेको छ । लगातार दुई खेलमा हार व्यहोरेको सरस्वतीले अंक जोड्न सकेको छैन ।
एन्फाका पुर्व उपाध्यक्ष ललितकृष्ण श्रेष्ठको स्मृतिमा अखिल नेपाल फुटबल संघ (एन्फा) ले आयोजना गर्ने प्रतियोगितामा ’ए’ डिभिजनका १४ क्लबले प्रतिस्पर्धा गरिरहेका छन् ।
लिग कम नकआउटका आधारमा सञ्चालन हुने प्रतियोगितामा सहभागि टिमलाई तीन समूहमा विभाजन गरिएको छ । समूह चरणका विजेता र उपविजेता सहित उत्कृष्ट २ टिमले नकआउट चरणमा स्थान बनाउनेछन् । प्रतियोगिताको विजेताले ३ लाख रुपैयाँ प्राप्त गर्नेछ । उपविजेताले १ लाख ५० हजार रुपैयाँ पाउनेछ ।