सातै प्रदेशको बजेट आज, प्रदेश ५ ले ३५ अर्बको बजेट ल्याउँदै

बुटवल ।
आज सातै वटा प्रदेश सरकारले बजेट ल्याउदै छन् । आगामी आर्थिक वर्ष २०७६÷७७ का लागि आज सबै प्रदेशले एकसाथ बजेट ल्याउन लागेका हुन् ।
सबै प्रदेशमा बजेट पेश गर्न दिउसो प्रदेश सभाको बैठक बोलाईएको छ । प्रदेश सभाका बैठकमा सबै प्रदेशका आर्थिक मामिला तथा योजनामन्त्रीहरुले बजेट प्रस्तुत गर्ने छन । संवैधानिक व्यवस्था अनुसार संघीय सरकारले जेठ १५ गते, प्रदेश सरकारहरुले असार १ गते र स्थानीय तले असार १० गते बजेट ल्याउनु पर्ने छ । संघीय सरकारले अनुदान तथा आन्तरिक स्रोतलाई समेटेर प्रदेश सरकारहरुले बजेट ल्याउने तयारी गरेका छन् ।

प्रदेश ५ मा ३५ अर्बको बजेट, बजेट खर्च गर्ने मुख्य लक्ष्य

प्रदेश नम्बर पाँचको सरकारले आइतबार ३५ अर्ब रुपैयाँ बराबरको बजेट सार्वजनिक गर्दैछ । दिउँसो ३ बजे प्रदेश सभा भवन बुटवलमा आर्थिक मामिला मन्त्रालयको समेत जिम्मेवारी सम्हाल्नु भएका मुख्यमन्त्री शंकर पोखरेलले बजेट सार्बजनिक गर्ने कार्यसूची रहेको छ ।

यो बजेटमा कृषिको आधुनिकीकरण, पर्यटन तथा भौतिक पूर्वाधार विकासलाई प्राथमिकता दिने सरकारको तयारी छ । चालु वर्ष २८ अर्ब रुपैयाँ बराबरको बजेट सार्वजनिक गरेर खर्च गर्न नसकेको आरोप खेपेको सरकारले अहिले भने पूर्ण कार्यन्वयन हुने खालको बजेट तयार गरेको प्रदेश नम्बर पाँचका उद्योग, पर्यटन, वन तथा वातावरण मन्त्री लिला गिरीले बताउनुभयो ।