डढेलो निभाउन उडेको हेलिकप्टर दुर्घटना, ६ सैनिकको मृत्यु

मेक्सिको ।
मेक्सिकोमा एक सैनिक हेलिकोप्टर दुर्घटना हुँदा कम्तिमा पनि ६ जनाको मृत्यु भएको छ । कुएरेटारो राज्यस्थित हाल्पान डे सिएर्रा शहरबाट ८५ किलोमिटर उत्तरमा मेक्सिकन नौसेनाको हेलिकाप्टर दुर्घटनामा परेको हो । जंगलमा लागेको डढेलो नियन्त्रण गर्ने अभियानमा रहेका बेला उडान भरेको हेलिकोप्टर दुर्घटनाग्रस्त भएको अधिकारीले जनाएका छन् । हेलिकोप्टर दुर्घटना हुनुको कारण स्पष्ट भइनसकेको जनाइएको छ ।
हेलिकोप्टर दुर्घटनाबारे अनुसन्धान शुरु गरिएको अधिकारीले जनाएका छन् । हेलिकोप्टर दुर्घटनामा मारिएकाहरुप्रति त्यहाँका राष्ट्रपति आन्द्रेज म्यानुअल लोपेज ओब्रादोरले शोक व्यक्त गरेका छन् ।