गर्मीका कारण कपिलवस्तु नगरका विद्यालय बन्द

मायादेवी अनलाइन, तौलिहवा ।
गर्मी अत्याधिक बढेपछि कपिलवस्तुका अधिकाँश विद्यालय बन्द भएका छन् । अत्याधिक तापक्रम बढेपछि कपिलवस्तु नगरपालिकाले पनि एक हप्ताका लागि विद्यालय बन्द गर्ने जनाएको छ । नगरपालिकाले एक सुचना जारी गरी नगरपालिका हाता भित्रका विद्यालय एक साता सम्मको लागि बन्द गर्ने जनाएको हो । नगरपालिकाका अधिकाँश सामुदायिक विद्यालयमा टिनको छाना भएको र कक्षाकोठामा पंखा समेत नभएका कारण चर्को गर्मीमा विद्यार्थीलाई पढाई सास्ती हुने गरेको छ ।
जेठ १२ गते आइतबार देखि १७ गते शुक्रबार सम्म नगरका सबै विद्यालय बन्द गरिएको नगर शिक्षा शाखाले जनाएको छ । यस अघि वाणगंगा नगरपालिकाले पनि एक सुचना जारी गर्दै एक साता सम्मका लागि विद्यालय बन्द गर्ने निणर्य गरेको थियो ।