क्रिकेटर सन्दीप लामिछाने अष्ट्रेलिया प्रस्थान

काठमाडौं ।
नेपाली युवा खेलाडी सन्दीप लामिछाने अष्ट्रेलिया प्रस्थान गरेका छन् । हालै आईपीएल खेलेर भारतबाट फर्किएका सन्दीप आज अष्ट्रेलिया प्रस्थान गरेका हुन् । केही दिन चितवनमा घर परिवारसँग बिताएका सन्दीप अष्ट्रेलियाबाट जुनको दोस्रो साता फर्कने जनाइएको छ ।
नेपाली क्रिकेटको विकासका विषयमा अष्ट्रेलियामा छलफल गर्ने सन्दीपले बताए । नेपालले एकदिवसीय वरीयता पाएपछि पछिल्लो समय नेपाली क्रिकेटको अन्तर्रा्ष्ट्रिय स्तरमा चर्चा बढेकाले नेपाली क्रिकेटको विकासका लागि अस्ट्रेलियामा केही पहल गर्ने उनको भनाइ थियो ।
अष्ट्रेलियाको बिग ब्याशमा मेलवर्न स्टार्सबाट खेलेका उनले त्यहाँ रहँदा क्लबका पदाधिकारीसँग छलफल गर्ने पनि बताए । उनले नेपालका केही खेलाडीहरुलाई प्रशिक्षणका लागि अष्ट्रेलियामा व्यवस्था गर्ने विषयमा पनि छलफल हुने बताए ।