चेल्सी र आर्सनल युरोपा लिग फुटबलको फाइनलमा

एजेन्सी,

चेल्सी र आर्सनल युरोपा लिग फुटबलको फाइनलमा प्रवेश गरेका छन् । सेमिफाइनलको दोस्रो लेग अन्तर्गत बिहीबार राति भएका खेलमा जित निकाल्दै दुवै टिमले फाइनलमा स्थान पक्का गरेका हुन् ।

घरेलु मैदानमा भएको खेलमा चेल्सीले फ्र्यांकफर्टसँग १-१ को बराबरी खेलेको हो । पहिलो लेगमा पनि १-१ को बराबरी भएकाले समग्रमा २-२ को बराबरी भएपछि फाइनल प्रवेश गर्ने टिमको निर्णय टाइब्रेकरबाट गरिएको हो । टाइब्रेकरमा चेल्सीले ४-३ को जित निकाल्यो । चेल्सीका लागि इडन हजार्डले विजयी पेनाल्टी गोल गरेका हुन् ।

यस्तै राति नै अवे मैदानमा भएको खेलमा आर्सनलले स्पेनिस क्लब भ्यालेन्सियालाई ४-२ ले हराउँदै समग्रमा ७-३ को जितसहित फाइनलमा स्थान बनाएको छ । आर्सनलको जितमा पियर एमरिकले ह्याट्रिक गरे भने एलेक्सान्ड्र लाकाजेटीले एक गोल गरे । भ्यालेन्सियाका लागि केविन गामेइरोले दुई गोल गरेका हुन् ।