टिप्परको ठक्करबाट मोटरसाइकल चालकको मृत्यु, गाडीबाट थुतेरै चालक माथि कुटपिट !

मायादेवी अनलाइन, वाणगंगा ।
कपिलवस्तुमा टिप्परको ठक्करबाट एक जनाको मृत्यु भएको छ । विहीबार दिउँसो कपिलवस्तु नगरपालिका वडा नं. ८ दोहनीमा टिप्परको ठक्करबाट मोटरसाइकल चालकको मृत्यु भएको हो ।
जिल्ला प्रहरी कार्यालय कपिलवस्तुका अनुसार लु १ ख ६१६८ नं.को टिप्परले लु २८ प ६१५४ नं. को मोटरसाइकललाई ठक्कर दिएको हो । मृतक कपिलवस्तु नगरपालिका वडा नं. ७ धरमपानीका लजी धोबि रहेका छन् ।
यता आक्रोसित भिडले टिप्पर चालकलाई गाडीबाटै थुतेर कुटपिट गरेका छन् । स्थानीयको कुटपिटले चालक घाइते भएको बताइएको छ । दुर्घटनाग्रस्त क्षेत्र केही घण्टा तनावग्रस्त भएको थियो । अहिले घटनाबारे अनुसन्धान भैरहेको प्रहरीले जनाएको छ ।