‘किक २’ मा ज्याकलिनको ठाउँमा यी हिरोइन

मुम्बई ।
सलमान खान र दीपिका पादुकोणको जोडी बन्ला बन्ला जस्तो हुन्छ, तर बन्दैन । कतिपटक त निर्देशकले यी दुईको जोडी बनाउन चाहे तर पूरा भएन ।

सलमान र ज्याकलीन फर्नाडिजलाई लिएर बनेको फिल्म ‘किक’ मा पनि पहिलो रोजाइ दीपिका नै थिइन् तर यो फिल्म दीपिकाको हातबाट गुम्यो । उक्त भूमिकामा ज्याकलीनले अभिनय गरिन् ।

‘किक २’ बन्ने हल्ला चलेको धेरै समय बितिसकेको छ । फिल्मको रिलिज मिति पनि सार्वजनिक गरिएको छ । तर, छायांकन भने अझै थालिएको छैन । यतिसम्म कि हिरोइन को हुने भन्ने पनि अत्तोपत्तो छैन ।

हाल भने एउटा नयाँ कुरा बाहिर आएको छ । ‘दबंग ३’ को छायांकनमा व्यस्त छन् सलमान खान । फुर्सद हुनासाथ उनी ‘किक २’ को छायांकन शुरु गर्नेछन् । अहिले खबर आएको छ कि, ‘किक २’ मा दीपिका पादुकोणले अभिनय गर्ने भएकी छिन् ।
भारतीय मिडियाले सूत्रको हवाला दिँदै ज्याकलीन फिल्मबाट आउट भएको र दीपिका पादुकोणलाई लिन लागिएको लेखेका छन् ।

सलमानको फिल्ममा हिरोइनका लागि खासै धेरै भूमिका हुँदैन । दीपिका पनि त्यस्तो सानो भूमिकामा त अभिनय गर्न चाहँदैनन् । यो फिल्ममा भने दीपिकाको भूमिका पनि शक्तिशाली बनाउन लागिएको बताइएको छ ।
फिल्म टिमले यसबारेमा औपचारिक जानकारी भने दिएको छैन ।