फाइनलमा चेन्नाई कि मुम्बई ?

काठमाडौँ ।
इन्डियन प्रिमियर लिग आईपीएल क्रिकेट प्रतियोगिताको फाइनल प्रवेशका लागि आज मंगलबार चेन्नाई सुपर किंस र मुम्बई इन्डियन्सबीच प्रतिस्पर्धा हुँदैछ ।
यो खेल नेपाली समय अनुसार बेलुकी ७ः ४५ बजे सुरु हुने छ । खेलको विजेता सिधै फाइनल प्रवेश गर्ने छ भने पराजित टीमले फाइनल प्रवेशका लागि थप एक मौका पाउनेछ ।
मुम्बईले चेन्नाई विरुद्धको लिग चरणका दुवै खेलमा जित निकालेको थियो । मंगलबारको खेलमा पनि चेन्नाईलाई पराजित गर्दै मुम्बई आफ्नो दबदबा कायम राख्न चाहन्छ । चेन्नाई भने लिग चरणमा भोगेको पराजयको बदला लिने रणनीतिका साथ मैदान उत्रने छ ।
चेन्नाईका लागि कप्तान महेन्द्रसिंह धोनीको रणनीतिलाई बलियो मानिन्छ भने मुम्बईका लागि किरन पोलार्ड र हार्दिक पाण्ड्याको ब्याटिङ बलियो पक्ष छ ।
यो खेलमा पराजित हुने टिमले इलिमिनेटर राउण्डबाट विजेता बनेर आएको टिमसँग दोस्रो क्वालिफायरमा फाइनल प्रवेशका लागि प्रतिस्पर्धा गर्नेछ ।

इलिमिनेटर राउण्डमा दिल्ली क्यापिटल्स र सनराइजर्स हैदरावादबीच बुधबार प्रतिस्पर्धा हुनेछ ।