प्रियिमर लिगः म्यानचेस्टर सिटीको संघर्षपूर्ण जित

एजेन्सी ।
इंग्लिस प्रिमियर लिग फुटबलको उपाधि होडमा साबिक विजेता म्यानचेस्टर सिटीले आफूलाई अन्तिम खेलसम्म बलियो दाबेदारका रुपमा प्रस्तुत गरेको छ ।
लिग अन्तर्गत सोमबार राति भएको खेलमा पेप गार्डिवलाको टिम म्यानचेस्टर सिटीले घरेलु मैदानमा उपाधि होडमा महत्वपूर्ण रहेको खेलमा जित निकालेको हो । म्यानचेस्टर सिटीले लेस्टर सिटीमाथि १–० को संघर्षपूर्ण जित दर्ता गरेको हो ।
पहिलो हाफमा गोलरहित भएको खेलमा म्यानचेस्टर सिटीका लागि ७० औँ मिनेटमा कप्तान भिन्सेन्ट कम्पनीले विजयी गोल गरे । यो खेलमा जित निकाले मात्रै उपाधि होडमा कायम रहने थाहा भएको म्यानचेस्टर सिटीका लागि कप्तान कम्पनीले गोल गरेर जित दिलाएका हुन् ।
कप्तान कम्पनीले यो सिजन प्रिमियर लिगमा गरेको यो नै पहिलो गोल हो । जितले सिटी फेरि शीर्षस्थानमा पुगेको छ । अर्थात उसले लिभरपुलाई पछि पारेको छ र एक अंकको अग्रता लिएको छ ।
अब लिगको अन्तिम खेलमा आइतबार हुने प्रतिस्पर्धाले उपाधिको टुंगो लाग्नेछ । आउँदो आइतबार सिटीले ब्राइटनसँग खेल्नेछ भने लिभरपुलले वुल्भ्सको सामना गर्नेछ ।
म्यानचेस्टर सिटीको ९५ तथा लिभरपुलको ९४ अंक छ । अब आउँदो आइतबार हुने खेलमा दुवैले जित निकालेमा सिटी नै विजेता बन्ने छ । दुवैले बराबरी गरेको अवस्थामा पनि सिटी नै विजेता बन्ने छ ।

सिटी चार गोलसम्मको अन्तरले पराजित भएको र लिभरपुलले गोल रहित या १–१ को बराबरी गरेको अवस्थामा पनि सिटी नै विजेता बन्ने छ । तर सिटी पराजित भएको र लिभरपुल विजयी भयो भने उपाधि लिभरपुलको पोल्टामा आउने छ ।