चेल्सीसँग रोकियो म्यानचेस्टर युनाइटेड

एजेन्सी ।
इंग्लिस प्रिमियर लिग फुटबलको शीर्ष चारमा अटाउने आर्सनलको सम्भावनामा गम्भीर धक्का लागेको छ । लिग अन्तर्गत आइतबार राति भएको खेलमा लेस्टर सिटीसँग पराजित भएसँगै आर्सनलको शीर्षचारमा अटाउने सम्भावना कम देखिएको हो ।
घरेलु मैदानमा भएको खेलमा लेस्टर सिटीले १० खेलाडीमा सीमित भएको आर्सनललाई ३–० ले पराजित गरेको हो । ३६ औँ मिनेटमा दोहोरो पहेँलो कार्ड खाँदै एन्सली मेटल्याण्ड–नाइल्स मैदानबाट बाहिरिएपछि आर्सनल १० खेलाडीमा सीमित भयो ।
पहिलो हाफमा गोल गर्न नसकेको लेस्टरले दोस्रो हाफमा तीन गोल गरेको हो । उसका लागि जेमी भर्डीले दुई गोल गरे । उनले ८६ औँ मिनेट तथा इन्जुरी समयको पाँचौँ मिनेटमा गोल गरेका हुन् । त्यसअघि ५९ औँ मिनेटमा युरी टिलेमान्सले गोल गरेका थिए ।
हारपछि पाँचौँ स्थानको आर्सनलको ३६ खेलबाट ६६ अंक छ । चौथो स्थानको चेल्सीको ६८ अंक छ । जित निकालेको लेस्टर सिटी ५१ अंकसहित आठौँ स्थानमा उक्लिएको छ ।

यस्तै लिग अन्तर्गत आइतबार राति नै भएको खेलमा चेल्सी र म्यानचेस्टर युनाइटेडले बराबरी खेलेका छन् । घरेलु मैदानमा भएको खेलमा युनाइटेड चेल्सीसँग १–१ को बराबरीमा रोकिएको हो ।
युनाइटेडका लागि ११ औँ मिनेटमा आन माटाले गोल गरे । चेल्सीका लागि मार्को एलोन्सोले ४३ औँ मिनेटमा गोल गरेका हुन् । बराबरीपछि छैटौँ स्थानको युनाइटेडको ६५ अंक भएको छ ।