महत्वपूर्ण खेलमा आर्सनल पराजित

एजेन्सी, आर्सनलले इंग्लिस प्रिमियर लिग फुटबलको चौथो स्थानमा फर्किने मौका गुमाएको छ । लिग अन्तर्गत बुधबार राति भएको खेलमा वुल्भ्ससँग ३–१ ले पराजित भएर आर्सनलले मौका गुमाएको हो ।

लिग अन्तर्गत अवे मैदानमा भएको खेलमा आर्सनलले गोल गर्ने राम्रा अवसर गुमायो र खेलमा हार बेहोरेको हो । वुल्भ्सको जितमा तीनै गोल पहिलो हाफमा नै भएको हो ।

उसका लागि २८ औँ मिनेटमा रुवेन नेवेस, ३७ औँ मिनेटमा म्याट डोहेर्टी र पहिलो हाफको इन्जुरी समयमा डिओगो जोटाले गोल गरेका हुन् । आर्सनलका लागि दोस्रो हाफमा सोक्राटिसले गोल गरे । उनले ग्रानेट जाकाको पासमा ८० औँ मिनेटमा गोल गरेका हुन् ।

हारपछि पाँचौँ स्थानको आर्सनलको ३५ खेलबाट ६६ अंक नै छ । चौथो स्थानमा रहेको चेल्सी भन्दा एक अंकले पछि रहेको आर्सनल छैटौँ स्थानको म्यानचेस्टर युनाइटेड भन्दा दुई अंकले अघि छ ।

जित निकालेको वुल्भ्स ३५ खेलबाट ५१ अंकसहित सातौँस्थानमा पुगेको छ ।