लेनदेनको विषयमा विवाद हुँदा साथीको हत्या प्रयास

बुटवल ।
अर्घाखाँचीको छत्रदेव ४ केरुङ्गाका कैलाश भुसाललाई सोही ठाउँका सुवास भुसालले आज खुकुरी हानेर हत्या प्रयास गरेका छन् ।
अर्घाखाँचीबाट दुबैजना एउटै मोटरसाइकलमा बुटवल आउँदै गर्दा रुपन्देही र पाल्पाको सिमाना बल्ढेङगढीमा कैलाशको हत्या प्रयास भएको प्रहरीले जनाएको छ ।
सुवासलाई प्रहरीले नियन्त्रणमा लिएको छ । घाइते कैलाश बेहोस रहेको र अहिले बुटवलको लुम्बिनी प्रादेशिक अस्पतालमा अप्रेशन सुरु भएको इलाका प्रहरी कार्यालय बुटवलका प्रहरी नायव उपरीक्षक डिलबहादुर मल्लले जानकारी दिनुभयो।
कैलाशको बाँया हात र गर्धनमा गहिरो चोट लागेको छ । हात चुड्ने अबस्थामा रहेको बताइएको छ ।
हत्या प्रयास गर्ने सुवासले नै एम्बुलेन्समा कैलाशलाई अस्पताल र्पुयाएको प्रहरीले बताएको छ । प्रहरीले सुवासलाई नियन्त्रणमा लिएर थप अनुसन्धान सुरु गरेको छ ।
सुवास तिलोत्तमामा बिजुली पसलका संचालक भएको खुलेको छ । कैलाशलाई करिब ८ लाख दिनुपर्ने र सोही कारण हत्या प्रयास भएको प्रारम्भिक अनुसन्धानबाट खुलेको प्रहरीको भनाइ छ ।
उनीहरुबीच भएको लेनदेनको कागजपत्र समेत भेटिएको प्रहरीले बताएको छ ।