रानाको ८५ र रसलको ६५ रन खेर गयो, कोहलीको शतकमा बैङलोरको दोश्रो जित

मायादेवी अनलाइन, कपिलवस्तु । 

कप्तान विराट कोहलीको शतक र मोइन अलीको अलराउण्ड प्रदर्शनमा रोयल च्यालेन्जर्स बैङ्लोरले दोश्रो जित हासिल गरेको छ । कोलकाताको इडन गार्डेन मैदानमा शुक्रबार राती बैङलोरले कोलकातालाई १० रनले हराएको हो । टस हारेर पहिले ब्याटिङको निम्तो पाएको बैङलोरले निर्धारित ओभरमा ४ विकेटको क्षतिमा २१३ रन बनाएको थियो । २१४ रनको लक्ष्य पछ्याएको कोलकाताले ४ विकेटको क्षतिमा २ सय ५ रनमा समेटियो ।

नीतिश रानाले नटआउट ८५ रन र आन्द्रे रसलले ६५ रन बनाए पनि टिमलाई जिताउन सकेनन् । रानाले ४६ बलमा ८५ रन बनाएका थिए भने रसलले २५ बलमा ६५ रन बनाएका थिए । निकै रोमाञ्चक खेलको अन्तिम बलमा बैङलोरका मोइन अलीले उत्कृष्ट बलिङ गरेपछि संघर्षपूर्ण जित हासिल गरेको हो । बैङलोरलाई जिताउन डेल स्टिनले २ विकेट लिए ।

यसअघि पहिले ब्याटिङ गरेको बैङलोरको लागि विराट कोहलीले जारी प्रतियोगिताको पहिलो तथा आइपिएलमा पाँचौ शतक प्रहार गरे । कोहलीले विष्फोटक ब्याटिङ गर्दै कोहलीले ५८ बलको सामना गर्दै शतक बनाएका हुन् । विराटले ९ चौका र ४ छक्का प्रहार गरे ।

उनी अन्तिम बलमा क्याच आउट भएका थिए। त्यस्तै विराटसँग मोइन अलीले उत्कृष्ठ साझेदारी गरी २८ बलमा ६६ रन जोड्दै क्याच आउट भए। आईपीएल इतिहासकै खराव लयमा रहेको रोयल च्यालेन्जर्स बैंग्लोरले शुक्रबार साँझ कोलकाताविरुद्ध उत्कृष्ट ब्याटिङ गरी जित हासिल गर्यो । जित हासिल गरे पनि बैङ्लोर अंक तालिकाको आठौँ स्थानमा छ भने कोलकाता छैठौँ स्थानमा छ ।