कांग्रेस सभापति भन्छन्, सरकारविरुद्ध ‘आन्दोलन’ गर्ने बेला भइसक्यो

काठमाडौं ।
नेपाली कांग्रेसका सभापति शेरबहादुर देउवाले सरकारले जनताको हितमा काम गर्न नसकेको भन्दै सरकारविरुद्ध आन्दोलन गर्नुपर्ने बेला आएको बताउनुभएको छ ।
नेपाल विद्यार्थी संघको ४९ औँ स्थापना दिवसका अवसरमा नेवि संघ काठमाडौंले शुक्रबार आयोजना गरेको ‘शुभकामना आदानप्रदान’ कार्यक्रममा सभापति देउवाले सरकारविरुद्ध आन्दोलन गर्नुपर्ने बेला आइसकेको बताउनुभएको हो ।
सभापति देउवाले विद्यार्थीसँगको छलफलमा नेवि संघको तदर्थ समिति गठन गर्ने बताउनुभयो । मुलुकको महत्वपूर्ण आन्दोलनको नेतृत्व गरेको नेवि संघ सरकारको विरुद्ध आन्दोलनमा होमिनुपर्ने बेला आएको उहाको भनाइ थियो ।
कांग्रेसका महामन्त्री डा शशांक कोइरालाले वर्तमान सरकार कुरा गर्ने काम नगर्ने तर्फ अगाडि बढेको बताउँदै यसको विरुद्द कांग्रेस एकजुट भएर लाग्नुपर्ने बेला आएको बताउनुभयो । कांग्रेसका नेता प्रकाशमान सिंहले वर्तमान सरकारले कम्युनिष्ट अधिकायकवादलाई मुलुकमा लागू गर्न खोजेको आरोप लगाउनुभयो ।