आईसीसी यू–१९ विश्वकप खेल्ने नेपालको सपना अधुरो

काठमाण्डौ ।
आईसीसी यू–१९ विश्वकप खेल्ने सपना अधुरो रहेको छ । मलेसियामा भएको छनोट प्रतियोगिताको अन्तिम खेलमा यूएईले ओमानलाई १० विकेटले हराएसँगै नेपालको झिनो आशा पनि समाप्त भएको हो ।
प्रतियोगितामा सिंगापुरविरुद्धको खेलमाबाट नै बलियो सुरुवात गरेको नेपालले प्रतियोगिताको मुख्य खेलका रुपमा रहेको यूएईविरुद्ध एक रनका झिनो हार ब्यहोर्न पुग्यो । वर्षाका कारण खेल सम्भव नभएपछि डकवर्थको नियमका आधारमा नेपाल एक रनले पछि पर्नु नै नेपालका लागि विश्वकपको ढोका खोल्ने यात्रामा तगोरो लाग्यो ।
त्यसपछि पनि नेपालले आफूलाई बलियो सावित गर्दै एकपछि अर्को जित निकाले पनि अर्कोपट्टि यूएईले पनि आफ्नो जितको यात्रालाई कायम राख्न सफल भयो ।
नेपालको अन्तिम आशाका रुपमा ओमानले यूएईलाई हराउन सक्छ की भन्ने थियो तर त्यस खेलमा यूएईले १० विकेटको जित निकालेपछि नेपालको सम्भावना समाप्त भएको हो ।