काँग्रेसले राष्ट्रिय जागरण अभियानको घोषणा गर्ने

काठमाडौँ ।
प्रमुख प्रतिपक्ष दल काँग्रेसले राष्ट्रिय जागरण अभियानको घोषणा गर्ने भएको छ । पार्टी कार्यालय सानेपामा पत्रकार सम्मेलन गरी राष्ट्रिय जागरण अभियानको घोषणा गर्न लागेको काँग्रेस प्रवक्ता विश्वप्रकाश शर्माले जानकारी दिनुभयो ।
काँग्रेस सभापति शेरबहादुर देउवाले केही दिनअघि पोखरामा भएको एक कार्यक्रमा पार्टीले नयाँ वर्षको सुरुबाटै सङ्गठन सुधारका लागि जागरण अभियान चलाउने बताएका थिए । काँग्रेसमा नेताहरुबीच पदीय भागबण्डामा किचलो देखिएपछि नेताकार्यकर्ता निराश भएको भन्दै नेतृत्वको चर्को आलोचना हुनुका साथै कार्यकर्ता तहमा नैराश्यता बढेको छ ।
काँग्रेस नेताहरुका अनुसार जागरण अभियान तीन चरणमा हुनेछ । पहिलो चरणको अभियान वैशाख ११ गते सुरु गर्ने तयारी छ । कार्यक्रम र समयतालिकाको औपचारिक घोषणा आज मङ्गलबार आयोजना गरिएको पत्रकार सम्मेलनमा सार्वजनिक गर्ने तयारी छ ।