डिफेन्डिङ च्याम्पियन बायर्न उक्लियो शीर्षस्थानमा

एजेन्सी ।

डिफेन्डिङ च्याम्पियन बायर्न म्युनिख जर्मन बुन्डेस लिगामा पुनः शीर्षस्थानमा उक्लिएको छ । जर्मन बुन्डेस लिगामा आइतबार राति भएको खेलमा बायर्नले घरेलु टोली फोर्टुना डुसेलडर्फमाथि ४–१ को जित निकाल्दै पुनः शीर्षस्थानमा उक्लिएको हो । बायर्नले २९ खेलबाट ६७ अंक जोड्यो । दोस्रो स्थानको बोरुसिया डर्टमन्डलाई १ अंकले पछि पारेको हो ।

बायर्नको फराकिलो जितमा किङ्सले कोमानले दुई तथा सर्जी जिनाब्री र लियोन गोरेट्जका ले समान १ गोल गरे । घरेलु टोलीका डुडी लुकिबाकियोले एक गोल फर्काए । बायर्नले सुरुवात देखि नै आक्रमक फुटबल खेल्दा खेलको १५ औं मिनेटमा कोमानको गोलबाट अग्रता लिएको थियो । ४१ औं मिनेटमा कोमानले व्यक्तिगत दोस्रो गोल गरेपछि बायर्न पहिलो हाफमा २–० ले अघि बढेको थियो ।

५५ औं मिनेटमा सर्जी जिनाब्रीले अर्काे गोल गर्दा बायर्न फराकिलो जिततर्फ अग्रसर बन्यो । ८९ औं मिनेटमा फोर्टुनाका डुडीले पेनाल्टीमार्फत गोल फर्काउदै गोल अन्तर कम गरेपनि इन्ज्युरी समयको थप गरिएको दोस्रो मिनेटमा लियोनले गोल गर्दै बायर्नलाई ४–१ को फराकिलो जित दिलाए । यससँगै जर्मन बुन्डेस लिगाका उपाधि होड झनै रोमाञ्चक बनेको छ ।