आईपीएलमा आज दुई खेल, राती दिल्ली र हैदराबाद भिड्ने

एजेन्सी ।
इन्डियन प्रिमियर लिग (आईपीएल) क्रिकेटमा आज नेपाली राष्ट्रिय टोलीका लेग स्पिनर सन्दीप लामिछाने रहेको दिल्ली क्यापिटल्सले खेल्दैछ । हैदरावादस्थित राजिव गान्धी क्रिकेट मैदानमा हुने खेलमा दिल्लीले सनराईजर्स हैदरावादसँग प्रतिस्पर्धा गर्नेछ ।
दुई टोलीबीचको खेल नेपाली समयअनुसार राति ८ः१५ मा सुरु हुनेछ । हैदरावादविरुद्ध दिल्लीले सन्दीपलाई मैदान उतार्ने सम्भावना कम छ । यसअघि रोयल च्यालेन्जर्स बैंग्लोरविरुद्धको खेलमा खराब प्रदर्शन गरेका सन्दीपलाई दिल्लीले कोलकत्ताविरुद्धको खेलमा खेलाएको थिएन ।
सन्दीपले जारी सिजन ४ खेलमा ५ विकेट लिएका छन् । दिल्ली हैदरावादविरुद्धको खेलमा पाँचौ जितको खोजीमा रहनेछ । दिल्लीले ७ खेलमा ४ जित निकाल्दै ८ अंक जोडेको छ । हैदरावादले ६ खेलमा ३ जितसहित ६ अंक जोडेरको छ ।
यस्तै आइतबार हुने पहिलो खेलमा शीर्ष स्थानको चेन्नई सुपर किङ्सले दोस्रो स्थानको कोलकत्ता नाइट राइडर्ससँग प्रतिस्पर्धा गर्नेछ । कोलकत्तास्थित इडेन गार्डेनमा हुने खेल नेपाली समयअनुुसार अपरान्ह ४ः१५ मा सुरु हुनेछ ।