पुछारको टिमसँग बार्सिलोना रोकियो

एजेन्सी ।
स्पेनिस ला लिगा फुटबल अन्तर्गत शनिबार राति भएको खेलमा लिग लिडर बार्सिलोना पुछारको क्लब हुएस्कासँग बराबरीमा रोकिएको छ । अवे मैदानमा भएको खेलमा बार्सिलोना हुएस्कासँग गोलरहित बराबरीमा रोकिएको हो ।
हुएस्कासँगको खेलमा बार्सिलोनाको टिम साबिक भन्दा केही परिवर्तन गरिएको थियो । बार्सिलोना उसको क्षमता भन्दा केही कमजोर थियो । बार्सिलोनाका ६ जना नियमित पहिलो रोजाइका खेलाडीलाई आराम दिइएको खेलमा बार्सिलोना कमजोर टिमसँग गोल रहित बराबरीमा रोकिएको हो।
लियोनल मेस्सीसहितका खेलाडीलाई आउँदो मंगलबार हुने च्याम्पियन्स लिग फुटबल अन्तर्गत क्वाटरफाइनलको दोस्रो लेगलाई ध्यानमा राखेर आराम दिइएको हो । हुएस्कासँगको खेलमा चार खेलाडीले बार्सिलोनाबाट ला लिगामा डेब्यु गरे ।
बराबरीपछि शीर्षस्थानको बार्सिलोनाको ३२ खेलबाट ७४ अंक भएको छ । लिग अन्तर्गत राति नै भएको खेलमा सेल्टा डी भिगोलाई २–० ले हराएको दोस्रो स्थानको एथ्लेटिको मड्रिडको ६५ अंक छ । अरु खेलमा स्पानियोलले एलाभेसलाई २–१ तथा सेभिल्लाले रियल बेटिसलाई ३–२ ले हराएका छन् ।