जनता मावि पिपराको नतिजा प्रकाशन तथा बार्षिक उत्सव

मायादेवी अनलाइन, वाणगंगा ।
जनता मावि पिपराले बुधबार नतिजा प्रकाशन, बार्षिकोत्सव तथा सम्मान कार्यक्रम सम्पन्न गरेको छ । प्रदेश सांसद विष्णु पन्थीको प्रमुख आतिथ्यमा भएको भएको कार्यक्रममा विद्यालयले बर्षभरी संचालन गरेका गतिविधिको बारेमा जानकारी गराएको छ ।
प्राचार्य रमेश पन्थीले बार्षिक प्रतिवेदन प्रस्तुत गर्दै आगामी योजनाको बारेमा पनि प्रकाश पार्नुभएको थियो । विद्यालयको मिहिनेत र अभिभावकको विश्वासले गर्दा आज विद्यालय राष्ट्रकै उत्कृष्ट विद्यालयको सूचीमा अटाएको भन्दै आगामी दिनमा थप भौतिक पूर्वाधारको विकास गर्दै अगाडी बढ्ने बताउनु भयो । कक्षा ११ र १२, एसईई वा अन्य कक्षामा विद्यार्थीले निरन्तर उत्कृष्ट नतिजा हासिल गर्न सफल रहेको बताउनु भयो ।

प्रमुख अतिथि पन्थीले जनता मावि जिल्ला र प्रदेशको गरिमा बढाउने विद्यालयको रुपमा चित्रित रहेका भन्दै मुक्तकंठले प्रसंसा गर्नुभयो । विद्यालयको सुदृढ प्रशासन रहने हो भने नििजमा भन्दा सामुदायिक विद्यालय अब्बल बन्न सक्ने एक मात्र उदाहरण जनता भएको भन्दै गुणस्तरीय शिक्षामा जोड दिनु भयो ।
कार्यक्रममा शिक्षा समन्वय इकाइका प्रमुख बाबुराम भट्टराई, बाणगंगा नगरका प्रवक्ता विष्णु पौडेल, शिक्षा शाखा प्रमुख खिम बहादुर जिसी लगायतले बोल्नु भएको थियो । कार्यक्रमकै अवसरमा उत्कृष्ट शिक्षक शिक्षिका, कर्मचारी, कक्षागत र समग्रमा उत्कृष्ट विद्यार्थी लगायतलाई सम्मान गरिएको छ ।