चेल्सीले टोटनह्याम र आर्सनललाई पछि पार्यो

एजेन्सी,
चेल्सी इंग्लिस प्रिमियर लिग फुटबलको शीर्ष तीनमा पुगेको छ । लिग अन्तर्गत सोमबार राति भएको खेलमा वेस्ट ह्याममाथि २–० को जित निकाल्दै चेल्सी टोटनह्याम र आर्सनललाई पछि पारेर तेस्रो स्थानमा पुगेको हो ।

घरेलु मैदानमा भएको खेलमा चेल्सीलाई जिताउन दुवै गोल इडन हजार्डले गरेका हुन् । उनले पहिलो र दोस्रो हाफमा एक एक गोल गरेर टिमलाई जित दिलाए ।

२४ औँ मिनेटमा हजार्डको गोलबाट चेल्सीले १–० को अग्रता लियो । ९० औँ मिनेटमा उनले व्यक्तिगत दोस्रो गोल गरेपछि चेल्सी २–० ले विजयी भयो ।

जितपछि तेस्रो स्थानमा पुगेको चेल्सीको ३३ खेलबाट ६६ अंक भएको छ । चौथो स्थानमा झरेको टोटनह्याम र पाँचौँ स्थानमा पुगेको आर्सनलको ३२ खेलबाट क्रमशः ६४ र ६३ अंक छ । ४२ अंकसहित वेस्ट ह्याम एघारौँ स्थानमा कायम छ ।