रियल मड्रिडले जित, बेन्जिमा बने नायक

एजेन्सी ।
सुरुमा पछि परेको खेलमा पुनरागमन गर्दै रियल मड्रिडले जित निकालेको छ । स्पेनिस ला लिगा फुटबल अन्तर्गत शनिबार राति भएको खेलमा जिनेदिन जिदानको टिम रियल मड्रिडले एइबरमाथि २–१ को जित निकालेको हो ।
घरेलु मैदानमा भएको खेलमा रियल मड्रिड पहिलो हाफमा १–० ले पछि परेको थियो । एइबरका लागि ३९ औँ मिनेटमा कार्डोनाले गोल गरेका थिए । रियल मड्रिडका लागि दुवै गोल करिम बेन्जिमाले गरेका हुन् ।

५९ औँ मिनेटमा बेन्जिमाले गोल गर्दै रियल मड्रिडलाई १–१ को बराबरीमा ल्याए । ८१ औँ मिनेटमा बेन्जिमाले व्यक्तिगत दोस्रो गोल गरेपछि रियल मड्रिडले जित निश्चित गरेको हो ।

जितपछि तेस्रो स्थानको रियल मड्रिडको ३१ खेलबाट ६० अंक भएको छ र उ दोस्रो स्थानको एथ्लेटिको मड्रिड भन्दा दुई अंकले पछि छ ।

लिग अन्तर्गत शनिबार राति नै भएका खेलमा स्पानियोलले जिरोनालाई २–१ तथा रायो भालेकानोले भ्यालेन्सियालाई २–० ले हराएका छन् ।