लिभरपुलाई रोक्यो म्यानचेस्टर युनाइटेडले

एजेन्सी ।
इंग्लिस प्रिमियर लिग फुटबल अन्तर्गत आइतबार राति भएको खेलमा म्यानचेस्टर युनाइटेडले लिभरपुललाई गोलरहित बराबरीमा रोकेको छ ।
लिग अन्तर्गत घरेलु मैदानमा भएको खेलमा उपाधि होडमा पहिलो दाबेदारका रुपमा रहेको लिभरपुललाई म्यानचेस्टर युनाइटेडले गोलरहित बराबरीमा रोकेको हो ।

दुवै तर्फबाट गोलका लागि प्रयास भए तर गोल हुन सकेन । बराबरीपछि लिभरपुल फेरि शीर्षस्थानमा उक्लिएको छ । उसको २७ खेलबाट ६६ अंक भएको छ । दोस्रो स्थानमा झरेको म्यानचेस्टर सिटीको ६५ अंक छ ।
पाँचौँ स्थानमा झरेको म्यानचेस्टर युनाइटेडको ५२ अंक भएको छ । आइतबार राति नै भएको खेलमा साउथह्याम्पटनलाई २–० ले हराएको आर्सनल फेरि शीर्ष चारमा फर्किएको छ ।

घरेलु मैदानमा भएको खेलमा आर्सनललाई जिताउन एलेक्सान्ड्र लाकाजेटी र हेनरिक एमखितर्यानले गोल गरे । चौथो स्थानमा उक्लिएको आर्सनलको २७ खेलबाट ५३ अंक भएको छ ।