पिएसजीको शानदार जित, म्यानचेस्टर स्तब्ध

एजेन्सी ।
दुई स्टार खेलाडी बिहीन पेरिस सेन्ट–जर्मेन (पिएसजी) ले पछिल्लो समय उत्कृष्ट लयमा रहेको र स्टार खेलाडीले युक्त म्यानचेस्टर युनाइटेडलाई स्तब्ध पारेको छ । च्याम्पियन्स लिग फुटबल अन्तर्गत अन्तिम १६ को पहिलो लेगमा गएराति भएको खेलमा म्यानचेस्टर युनाइटेड घरेलु मैदानमै पिएसजीसँग २–० ले पराजित भएको हो । पछिल्ला लगातार ११ खेलमा अपराजित रहेको युनाइटेड १२ औँ खेलमा आएर पराजित भयो ।

चोटका कारण नेइमार र एडिन्सन काभानी मैदान बाहिर रहे पनि पिएसजीका केलियन एमबाप्पे र प्रेसनियल किमपेम्बेले त्यो अभाव पुरा हुन दिएनन् । पहिलो हाफ गोलरहित बराबरी भए पनि दोश्रो हाफमा पिएसजी चम्कियो । उसको लागि स्टार खेलाडी एम्बाप्पे र प्रेसनियल किमपेम्बेले गोल गरे ।

म्यानचेस्टर युनाइटेड अन्तिमको केही मिनेट १० खेलाडीमा सीमित भयो । ८९ औँ मिनेटमा पउल पोग्बा दोहोरो पहेँलो कार्ड खाँदै मैदानबाट बाहिरिए ।दोस्रो लेग आउँदो मार्च ६ मा पिएसजीको मैदानमा हुनेछ । यस्तै अर्को खेलमा रोमा विजयी भएको छ । घरेलु मैदानमा भएको खेलमा रोमाले पोर्चुगिज क्लब एफसी पोर्टोलाई २–१ ले हराएको हो ।