उपाधि होडमा टोटनह्याम, लेस्टर सिटी पराजित

एजेन्सी ।
उपाधि होडमा बलियो रुपमा प्रस्तुत हुँदै आएको टोटनह्यामले शीर्ष दुईमा रहेका म्यानचेस्टर सिटी र लिभरपुलमाथिको दबाब कायम राखेको छ ।
इंग्लिस प्रिमियर लिग फुटबल अन्तर्गत आइतबार राति भएको खेलमा लेस्टर सिटीलाई हराउँदै माउरिसिओ पोकेटिनोको टिम टोटनह्यामले आफूलाई उपाधि होडमा कायम राखेको हो । घरेलु मैदानमा भएको खेलमा टोटनह्यामले लेस्टर सिटीलाई ३–१ ले हराएको हो ।
टोटनह्यामको जितमा डेविन्सन सान्चेज, क्रिष्टियन एरिक्सन र सन हेङ–मिनले गोल गरे । लेस्टर सिटीका लागि जेमी भर्डीले एक गोल फर्काए ।
३३ औँ मिनेटमा सान्चेजको गोलबाट टोटनह्यामले पहिलो हाफमा १–० को अग्रता लियो । ६३ औँ मिनेटमा एरिक्सनले गोल गर्दै टिमको अग्रता दोब्बर पारे ।
७६ औँ मिनेटमा भर्डीले लेस्टर सिटीका लागि एक गोल फर्काए । भर्डीले यसअघि पाएको पेनाल्टीमा भने गोल गर्न सकेका थिएनन् । इन्जुरी समयको पहिलो मिनेटमा सनले गोल गरेपछि टोटनह्याम ३–१ ले विजयी भयो ।
जितपछि तेस्रो स्थानको टोटनह्यामको २६ खेलबाट ६० अंक भएको छ । उ म्यानचेस्टर सिटी र लिभरपुल भन्दा पाँच अंकले पछि छ । पराजित भएको लेस्टर सिटी २६ खेलबाट ३२ अंकसहित १२ औँ स्थानमा छ ।