कोपा डेल रे फुटबलः बार्सिलोना र रियल मड्रिड बराबरीमा रोकिए

एजेन्सी ।
स्पेनिस कोपा डेल रे फुटबल अन्तर्गत बुधबार राति भएको सेमिफाइनलको पहिलो लेगमा बार्सिलोना र रियल मड्रिडले बराबरी खेलेका छन् ।
चोटका कारण बेन्चमा रहेका लियोन मेस्सी बिहीन बार्सिलोना र चोटका कारण बेन्चमै रहेका ग्यारेथ बेल बिहीन रियल मड्रिडले पहिलो लेगमा बराबरी खेलेका हुन् ।
सेमिफाइनलमै एल क्लासिको भएपछि कोपा डेल रेको रौनक अरु खेलमा भन्दा चीरप्रतिद्वन्द्वी बार्सिलोना र रियल मड्रिडको खेलमा छ ।
बार्सिलोनाको मैदान क्याम्प नाउमा भएको खेलमा सुरुवाति अग्रता रियल मड्रिडले लिएको हो । तर उसले अग्रता जोगाउन सकेन ।
छैटौँ मिनेटमा नै लुकास भाज्क्वेजको गोलबाट रियल मड्रिडले अग्रता लियो । तर ५७ औँ मिनेटमा माल्कमले बार्सिलोनाका लागि बराबरी गोल फर्काए । यो एल क्लासिकोमा बार्सिलोनाबाट २१ वर्षे माल्कम तथा रियल मड्रिडबाट १८ वर्षे भिनिसिस जुनियर केन्द्रमा रहे ।
सेमिफाइनलको दोस्रो लेग आउँदो फेब्रुअरी २७ मा रियल मड्रिडको मैदान बर्नाबेउमा हुनेछ । बार्सिलोना लगातार पाँचौँपटक कोपा डेल रे को उपाधि जित्ने होडमा छ । यस्तै रियल मड्रिड अघिल्ला चार सिजन उपाधिबाट बाहिर रहेको भोक मेटाउने ध्यानमा छ ।