प्रतिनिधिसभाको बैठक बस्दै, ५ जना मन्त्रीले सांसदको प्रश्नको जवाफ दिँदै

काठमाडौं ।
प्रतिनिधिसभाको बैठकमा आज पाँच जना विभागीय मन्त्रीले सांसदका प्रश्नको जवाफ दिने कार्यसूची छ ।
दिउँसो १ बजे बोलाइएको बैठकमा गृह मन्त्री रामबहादुर थापा, कृषि तथा पशुपंक्षी विकास मन्त्री चक्रपाणी खनाल, महिला, बालबालिका तथा ज्येष्ठ नागरिक मन्त्री थममाया थापा, वन तथा वातावरण मन्त्री शक्ति बस्नेत र अर्थमन्त्री डाक्टर युवराज खतिवडाले सांसद्ले सोधेका प्रश्नको जवाफ दिने कार्यसूची रहेको प्रतिनिधिसभा सचिवालयले जनाएको छ ।

प्रधानमन्त्री र सांसदबीच प्रश्नोत्तर सुरु गरेको प्रतिनिधिसभाले मन्त्री र सांसदबीच पनि सवालजवाफ गर्न लागेको हो ।

यस्तै आजको बैठकमा नेपालको संविधान अनुकूल बनाउन केही नेपाल ऐनलाई संशोधन गर्ने विधेयकका सम्बन्धमा समितिको प्रतिवेदन, लोक सेवा आयोगको ५९ औं वार्षिक प्रतिवेदन, नेपाल प्रहरी र प्रदेश प्रहरी (कार्य सञ्चालन, सुपरिवेक्षण र समन्वय) विधेयक, प्रस्तुत गर्ने कार्यसूची छ ।

यसैगरी अख्तियार दुरुपयोग अनुसन्धान आयोग, राष्ट्रिय मानव अधिकार आयोग, सर्वोच्च अदालत, न्याय परिषद् र न्याय सेवा आयोगको वार्षिक प्रतिवेदन पनि सम्बन्धित मन्त्रीले पेश गर्ने कार्यसूची रहेको प्रतिनिधिसभा सचिवालयले जनाएको छ ।