राष्ट्रपति भण्डारीद्वारा क्रिकेट टोलीलाई बधाई

काठमाण्डौ ।
नेपाली क्रिकेट टोली यूएईसँगको तीन एकदिवसीय र तीन टी–२० शृङ्खला जित्दै सोमबार स्वदेश फर्कँदै छ ।अहिले नेपाली टोलीलाई बधाई दिने र नेपाली क्रिकेटको विकासमा नेपाल सरकारले आवश्यक पहलकदमी चाल्नुपर्ने भन्दै माग गर्नेहरुको संख्या बढिरहेको छ ।

त्यसै क्रममा राष्ट्रपति विद्यादेवी भण्डारीले पनि नेपाली क्रिकेट टोलीले ऐतिहासिक सफलता हासिल गरेको भन्दै बधाई दिनुभएको छ । साथै उहाँले नेपालमा लोकप्रिय बन्दै गएको क्रिकेट खेलको प्रवद्र्धनका लागि शैक्षिक प्रतिष्ठान र सम्बद्ध पक्ष अग्रसर हुने अपेक्षा लिएको बताउनुभएको छ ।

राष्ट्रपति भण्डारीको आधिकारिक ट्विटर ह्याण्डलमा लेखिएको छ, ‘नेपालले यूएईमा भएको तेस्रो टी–२० क्रिकेट खेलमा ऐतिहासिक सफलता हासिल गरेकोमा राष्ट्रिय क्रिकेट टिमलाई हार्दिक बधाई दिँदै उत्तरोत्तर प्रगतिको कामना गर्दछु । हाम्रो देशमा लोकप्रिय बनेको क्रिकेट खेलको प्रवद्र्धनका लागि शैक्षिक प्रतिष्ठान र सम्बद्ध पक्ष अग्रसर हुने अपेक्षा लिएको छु ।’