एइबरले पनि रियल मड्रिडलाई हरायो, यो संग पाचौं हार

एजेन्सी । 

स्पेनिस ला लिगामा रियल मड्रिडले अर्को हार ब्यहोरेको छ । शनिबार भएको खेलमा एइबरसँग रियल तीन शून्यले स्तब्ध बन्यो । पछिल्लो पटक निकै खराब फर्मका कारण आलोचित बनेको रियलले प्रशिक्षक बर्खास्त समेत गरेको थियो ।

तर नयाँ प्रशिक्षक आए पनि रियलले खेलमा सुधार गर्न सकेन । लिगका तल्लो भागमा रहेको एइबरले रियलविरुद्ध खेलको १६ औं मिनेटमा पहिलो गोल गर्यो ।

उसका लागि इस्कालान्टाले गोल गरे । पहिलो हाफमा एक गोलले पछि परेको रियलले दोस्रो हाफमा थप दुई गोल खायो ।

स्टार खेलाडीले भरिएको रियलविरुद्ध एइबरका सर्जी इनरीचले ५२ औं मिनेटमा दोस्रो गोल गरे । त्यसपछि ५७ औं मिनेटमा कीकीले एइबरका लागि तेस्रो गोल गर्यो । जारी लिगमा रियलको यो पाँचौ हार हो । उसको १३ खेलबाट मात्र २० अंक रहेको छ ।