दशौं कपिलवस्तु महोत्सवको पूर्व प्रधानमन्त्री पुष्पकमल दाहाल(प्रचण्ड) द्धारा समुद्घाटन हुने

बाबुराम रायमाझी, चारनम्बर ।
कपिलवस्तु उद्योग वाणिज्य संघ चारनम्बरले दशौ कपिलवस्तु महोत्सवको तयारीलाई तिव्र बनाएको छ । महोत्सवका सवै कार्यलाई व्यवस्थित बनाउन समयमै आवश्यक तयारी गरिरहेको संघले जनाएको छ । कपिलवस्तुको बुद्धरंगशालामा मंसिर १८ गते देखि पौष १ गते सम्म संचालन हुने महोत्सवको उद्घाटन कसले गर्ने भन्ने विषयलाई अन्तिम टुंगोमा पुर्याएको छ । महोत्सव आउन ११ दिन बाँकी छदै महोत्सवको समुद्घाटनको कार्यक्रम तयारी गरिसकेको संघका अध्यक्ष उमानाथ पौडेलले जानकारी दिनुभयो ।
१० औं कपिलवस्तु महोत्सव एवं कृषि, पर्यटन तथा औद्योगिक प्रदर्शनीको समुद्घाटन नेकपाका अध्यक्ष तथा पूर्व प्रधानमन्त्री पुष्पकमल दाहाल(प्रचण्ड) ले गर्नुहुनेछ । कपिलवस्तु उद्योग वाणिज्य संघले आयोजना गरेको दशौं कपिलवस्तु महोत्सवको मंसिर १८ गते विहान ११ बजे ठीक समयमै प्रचण्डले उद्घाटन गर्नुहुनेछ ।
नेकपा अध्यक्ष प्रचण्डले दशौ कपिलवस्तु महोत्सवको समुद्घाटन गर्ने भनिएसंगै यस क्षेत्रका उद्योग व्यवसायीलाई उत्साह थपेको छ । महोत्सवका विभिन्न विषयगत उपसमितिहरुको संघको कार्यालयमा वैठक आयोजना गरी महोत्सवका कार्यलाई प्रभावकारी बनाउदै लगिएको महोत्सवका निर्देशक रुक बहादुर भुसालले जानकारी दिनुभयो ।
नेता प्रचण्डले दशौ कपिलवस्तु महोत्सवको समुद्घाटन गर्ने कार्यक्रम तय भएसंगै महोत्सवलाई भब्य र सभ्य बनाउन सचिवालय तथा विषयगत समितिहरु सकृय भएको निति निर्माण समितिका संयोजक टोपनारायण वेल्वासेले जानकारी दिनुभयो । समितिहरुले आवश्यक योजना निर्माण गरेर तयारीका आवश्यक कामहरु अघि बढाइएको बताइएको छ ।