नगरप्रमुखद्वारा आफ्नो तलब भत्ता विद्यालयलाई

बर्दिया ।
बर्दियाको मधुवन नगरपालिका प्रमुख गणेशबहादुर क्षेत्रीले शिक्षाको गुणस्तर सुधार गर्ने भन्दै आफ्नो तलब भत्ताबाट विद्यालयलाई सहयोग गरेका छन् ।
नगर प्रमुख भएबापत राज्यले दिने सेवा सुविधा सामाजिक सेवामा लगाउने घोषणा गरेका क्षेत्रीले तलब भत्ताको रकमले सहयोग प्रदान गर्न थाल्नुभएको हो । नगरप्रमुख क्षेत्रीले भन्नुभयो, “राजनीति जनताका लागि गर्ने हो, पैसा कमाउन होइन ।”
उहाँले नगरपालिका–१ सूर्यपटुवाअन्तर्गत त्रिभुवन माध्यमिक विद्यालयलाई तीन महीनाको तलब रु एक लाख पाँच हजार सहयोग गर्नुभएको छ । होटल व्यवस्थापन कक्षा सञ्चालन र भौतिक पूर्वाधार विकास लागि आयोजित श्रीमद् भागवत धन धान्याञ्चल सप्ताह ज्ञान महायज्ञ तथा शैक्षिक महोत्सवमा उहाँले सो रकम सहयोग गर्नुभएको हो । उहाँले भन्नुभयो, “यहाँबाट नै आफ्नो सामाजिक कार्यको शुरुआत गरेको छु ।” क्षेत्रीले यसअघि एक महीना बराबरको तलब बिरामीको उपचारका लागि खर्च गर्नुभएको हो ।
प्रत्येक वडामा प्रविधिक कक्षा सञ्चालनार्थ र भौतिक अवस्था कमजोर रहेका विद्यालयलाई सहयोग गर्ने उद्देश्य लिएको बताउँदै क्षेत्रीले आफ्नो तलब रकम सबै जनताकै करको रकम भएकाले जनतालाई नै सहयोग गर्ने बताउनुभयो ।